सिरहा-अख्तियार दुरुपयोग अनुसन्धान आयोगका माननीय आयुक्त जय बहादुर चन्दले दिन प्रति दिन भ्रष्टाचार मौल्याउँदै गएकाले भ्रष्टाचार नियन्त्रण गर्न सबैले हातेमाले गर्नुको विकल्प नरहेको वताउनुभएको छ ।

अख्तियार नियन्त्रण कार्यालय बर्दिवासले आज सिरहामा आयोजना गरेको भ्रष्टाचार नियन्त्रण तथा सुशासन प्रबर्धन कार्यक्रममा बोल्नुहुँदै आयुक्त चन्दले कोरोना महामारीको बिच पनि आर्थिक वर्ष २०७७।०७८ मा आयोगमा विभिन्न माध्यमबाट २२ हजार ६ सय पच्चीस उजुरीहरु प्राप्त हुनु दुख्द रहेको समेत उहाँले उल्लेख गर्नुभयो ।

सीमित श्रोत साधनको बीच पनि आयोगले दिन हालसम्म विभिन्न माध्यमबाट आएका उजुरी मध्ये ६४.२३ प्रतिशत मुद्दा फरछ्यौट गरेको भए पनि वर्षेनी उजुरीमा आउने आकडाले आफूहरुलाई दुःखित तुल्याएको वताउनुभयो ।

अन्तक्र्रिया कार्यक्रममा सहभागीहरुले कार्य सम्पादनमा एक रुपता नहुनुको साथै कर्मचारीहरुको बेथितीको कारण पनि जिल्लाबाट बढी मुद्दा आयोगमा जाने गरेको आयोगलाई ध्यानाकर्षण गराएका थिए । 

मधेश प्रदेश जिल्लाहरुमध्ये बढी उजुरी पर्ने जिल्ला मध्ये धनुषा पहिलो र सिरहा दोश्रो स्थानमा रहेको जनाइएको छ । १७ वटा स्थानीय तह रहेको सिरहामा ३५६ वटा उजुरी रहेका छन् जसमध्ये हालसम्म एक सय १३ वटा मात्र फरछ्यौट भएको अख्तियार दुरुपयोग अनुसन्धान आयोग वर्दिवासले जनाएको छ ।

अख्तियार दुरुपयोग अनुसन्धान आयोगको कार्यालय बर्दिवासका प्रमुख सह सचिव गोपाल कुमार अधिकारी र अख्तियार दुरुपयोग अनुसन्धान आयोग टंगालका सह न्यायाधिवक्ता श्री घनश्याम ओझाले कार्यपत्र प्रस्तुत गर्नुभएको थियो भने कार्यपत्रमाथि प्रमुख जिल्ला अधिकारी सिरहाका लालबाबु कवारीले टिप्पणी गर्नुभएको थियो । 

माननीय आयुक्त जय बहादुर चन्दको अध्यक्षता, जिल्ला समन्वय समिति सिरहाका प्रमुख रामचन्द्र ठाकुरको प्रमुख आतिथ्यमा सम्पन्न कार्यक्रममा नगरपालिकाका नगरप्रमुख, उप प्रम्ुख, गाउँपालिकाका गाउँपालिका अध्यक्ष उपाध्यक्ष, प्रमुख प्रशासकीय अधिकृतहरु एवम् जिल्लामा रहेका सरकारी तथा गैरसरकारीका प्रमुखहरुको उपस्थिति रहेको थियो ।